„Слова сталася целам
і пасялілася між намі” (Ян 1, 14)
 
Шаноўныя Парафіяне, дарагія Госці, дабрачынцы нашай Парафіі
 
Разам з Марыяй і Юзафам, пераймаючы іх прастату і пакору, мы становімся на калені перад Словам, якое сталася целам: Езусам Хрыстом, нашым Збаўцам. У маўклівым пакланенні мы схіляемся перад вялікай таямніцай Уцелаўлення, якая напаўняе радасцю і супакоем усіх, хто прымае ў сваё сэрца Дзіцятка Езус.
Нельга спазнаць усю паўнату Божай любові! Вось Ён прыходзіць да ўсіх нас, хаця мы гэтага не заслугоўваем, Ён дае нам Сябе і запрашае да вечнага жыцця. На Каляды мы будзем адчуваць Яго асаблівую прысутнасць, але і верым, што Ён пастаянна прыходзіць да нас у кожнай малітве, парыванні сэрца, і перш за ўсё ў Святой Эўхарыстыі. Ён хоча толькі аднаго: каб мы прымалі яго з такой любоўю, якую толькі зможам адчуць.
 
Ламаючы калядны аплатак, жадаем Вам, дарагія Верныя, каб Нованароджаны Хрыстус напоўніў вашыя сэрцы непахіснай надзеяй, якая дазволіць пераадолець усе цяжкасці, моцнай верай, якая асвятляе нават самыя цёмныя дні, і глыбокай любоўю, якая можа ўбачыць пробліск дабра ў кожным чалавеку і заўсёды гатовая дараваць.
 
Жадаем усім, каб Каляды прайшлі ў атмасферы любові, радасці і дабрыні ў кампаніі родных і сяброў. Няхай дабраславеньне Божага Дзіцяці суправаджае Вас на працягу Новага 2021 года.
з малітвай і благаслаўленнем, Вашыя душпастыры