Паважаныя Парафіяне
Разам з усім Касцёлам мы пачынаем перыяд вялікапоснага пакаяння. Пост у хрысціянскай традыцыі – гэта асаблівы час падрыхтоўкі да найважнейшых святаў года.
Пасыпанне галоў у Папялец павінна быць відавочнай прыкметай пачатку перыяду разважанняў пра крохкасць жыцця, пакаяння і малітвы. Каталік павінен у гэты час асабліва засяродзіцца на сваёй веры і духоўным жыцці. Ён павінен усвядоміць непазбежнасць смерці, а таксама малітвай, пастом і міласцінай адпакутваць за грахі.
 
Перыяд Вялікага Посту – гэта заклік да нас, каб кожны аднавіў уласнае  жыццё, змяняючы тэмп сваёй паўсядзённай працы, і вярнуўся з больш моцнаю стараннасцю ў важных духоўных практыкаваннях, якія могуць ўнесці адпаведную жыццёвую разнастайнасць. Ісус Хрыстос у пачатку саракдзённай падрыхтоўкі да Вялікадня паказвае нам тры вельмі важныя спосабы асвячэння: малітву, пост і міласціну.
а. Малітва – гэта выпрабаванне і адзін са спосабаў выказаць нашу веру. Давайце паглядзім на нашу асабістую або сямейную малітву, канцэнтрацыю на ёй, ці адсутнасць увогуле, на парафіяльныя малітоўныя прапановы, такія як Крыжовы Шлях, Песні Жальбы, Парафіяльныя рэкалекцыі, адарацыя Найсвяцейшага Сакрамэнта. Паспрабуем паклапаціцца пра яшчэ больш прыгожае перажыванне нядзелі як святочнага дня.
 
б. У нашым духоўным станаўленні адыгрывае важную ролю пост, выкліканы найперш верай. Усе рэлігіі называюць пост не толькі сродкам  для лячэння  цела, але больш за ўсё спосабам аднаўлення духу. Пост або ўстрыманне ад непатрэбных заняткаў, забаў, задавальненняў умацоўвае нашу волю і дае большую эфектыўнасць малітве. Калі вучні спыталі Ісуса, чаму яны не маглі выгнаць злога духа, то пачулі адказ, што некаторыя віды злога могуць выйсці толькі праз малітву і пост. Як шмат розных праяў злога духа нам трэба яшчэ выкінуць. Не будзем жа бяздзейнічаць. Адным з галоўных ворагаў чалавека з’яўляецца алкаголь. Алкаголь наносіць шкоду многім сем’ям і разбурае жыццё чалавека. Добра ведаем, што ў нашай парафіяльнай супольнасці многія сем’і пакутуюць ад праблем, звязаных са  злоўжываннем алкаголю. Яшчэ адной небяспекай чалавека, асабліва дзяцей і моладзі, у цяперашні час становіцца тэлевізар і інтэрнэт, асабліва пры іх выкарыстанні без абмежаванняў і кантролю. Варта падумаць пра тое, колькі часу мы прысвячаем гэтым “сучасным ідалам”. Няхай час посту будзе магчымасцю адмовіцца ад алкаголю і скараціць час, які затрачваецца на тэлебачанне і  інтэрнэт.
 
в. Часта мы звяртаемся да іншых людзей, просячы аб міласэрнай дапамозе. Шчодрасць некаторых нас здзіўляе. Міласціна лечыць ад эгаізму, што дазваляе думаць не толькі аб сваіх уласных патрэбах і спажыванні, але і вучыць глядзець шырэй і дзяліцца тым, што маем з бяднейшымі за нас.  Заахвочваем дзяцей і моладзь, а таксама сем’і даваць велікапосную міласціну. Будзем жа сведкамі любові.
 
Шаноўныя, таксама рэкамендуем вам прысвячаць больш часу сваёй сям’і шляхам сумесных размоў, чытання Евангелля і каталіцкай прэсы, да якой цяпер ёсць доступ. Трэба толькі захацець гэтым скарыстацца. Усё гэта дапаможа нам паглыбіць уласную веру, каб ведаць вучэнне Касцёла і рухацца ў бок нашага Настаўніка і Госпада Ісуса Хрыста.
 
Падчас Вялікага Посту ў касцёлах адпраўляюцца спецыяльныя набажэнствы: у пятніцу “Крыжовы шлях”, у нядзелю “Песні жальбы”. Запрашаю ўсіх вас прыняць удзел у гэтых урачыстасцях.
 
Дабраслаўленага часу Вялікага Посту!
 
Kс. Станіслаў Мжыглуд SDS