Не паспела яшчэ распачацца лета, як колькасць вернікаў на Імшах пачала змяншацца. Заканчэнне катэхез у дзяцей, зразумела, не азначае магчымасці не наведваць святыя Імшы, але пра гэта павінны дбаць бацькі. А вось што рабіць, калі праводзіш лета на хутары, на лецішчы ці на курорце, дзе там шукаць Бога?
Паспрабуем разам знайсці адказ на гэтае пытанне.
 
Неабходнасць адпачынку
 
У артыкуле пра сутнасць адпачынку пробашч парафіі ксёндз Станіслаў Мжыглуд адзначаў, што адпачынак ‒ «гэта не прывілея для багатых, а натуральная патрэба кожнага чалавека», але ён «не павінен перакрэсліваць Бога: удзел у нядзельнай святой Імшы, малітву, прыняцце святых сакрамэнтаў». 
 
«Хоць на кароткі час, але неабходна адарвацца ад штодзённасці, паглядзець на сябе “з боку”, расслабіцца і набрацца новых сіл, бо чалавек – не машына і час ад часу патрабуе святога спакою. Да таго ж адпачынак спрыяе і таму, што чалавек атрымлівае шмат новых уражанняў, здольны па-новаму паглядзець на сваю працу; гэта важна. А паколькі гаворым цяпер пра тое, што адпачынак аднаўляе нас перш за ўсё фізічна, то параіў бы такую справу: адпачываць патрэбна так, каб усе клопаты, што былі перад гэтым, пакінуць, на некаторы час “забыцца” пра іх, не вяртацца нават у думках, даць адпачыць сваёй галаве… Калі чалавек, паехаўшы нават на мора, будзе бясконца вяртацца да праблемаў на сваёй працы, ён атрымае бяссонніцу, муку, і гэта ніяк не будзе добрым  адпачынкам, а марна затрачаным часам. Хрыстус не хоча, каб мы перасільваліся сваёй працай. Праца звыш меры таксама грэх, падобна, як і лянота. Езус дае параду ўсім: “Пайдзіце адны ў пустыннае месца і крыху адпачніце” (Мк 6, 31)» ‒ падкрэсліў святар. 
 
Дзе маліцца падчас адпачынку?
 
Адпачынак патрэбен усім (нават калі ён праходзіць на градках з бульбай)). Што ж рабіць з малітвай і ўдзелам у святой Імшы? Ну, для таго, каб маліцца, чалавеку нічога не патрэбна, акрамя часу. Як дадае пробашч, «католік памоліцца там, дзе адпачывае, супольнай малітвай са сваёю сям’ёю, з блізкімі. Таму, адпраўляючыся ў падарожжа, бярыце з сабою малітоўнік, ружанчык, крыжык – усё, што яднае вас з Езусам Хрыстом і што дапаможа вам не страціць з Ім сувязь падчас адпачынку».
Так што тут усё зразумела. А наконт нядзельнай літургіі ‒ трэба шукаць святыню (прычым у адсутнасці каталіцкай католік можа наведваць праваслаўную літургію, а таксама скарыстацца з сакрамэнтаў у Праваслаўнай Царкве). 
 
Як адзначаў ксёндз Уладзімір Шыдлоўскі ў адным з нумароў парафіяльнай газеты, «трэба памятаць, што Касцёл Каталіцкі і Праваслаўны ‒ гэта братнія Касцёлы і маюць адны карані і апостальскую правапераемнасць. Азначае гэта, што ўсе сакрамэнты для хрысціяніна годныя як ў Каталіцкім Касцёле, так і ў Праваслаўнай Царкве. Таму можна ў такіх сітуацыях пайсці ў праваслаўную царкву. Калі хто кажа, што праваслаўнаму нельга ісці ў каталіцкі касцёл, то гэта не згодна з вучэннем праваслаўя. Апостальская правапераемнасць азначае непрырыўнасць біскупаў (пачаўшы ад апосталаў) законна абраных і кансэкраваных, якія захоўваюць і пераказваюць праўды веры».
 
Адшукаць месцазнаходжанне святыні дапаможа інтэрнэт (у нашыя часы не будзе складанасці знайсці адрас касцёл ці то ў беларускай вёсцы, ці на сусветных курортах). Варта толькі пра гэта паклапаціцца загаддзя. 
 
Калі ж ваша падарожжа пачынаецца ў нядзелю, то пажадана схадзіць напярэдадні, у суботу, на вячэрнюю Імшу ў сваёй парафіі. 
 
Калі ж касцёла ці царквы ў краіне ці мясцовасці вашага прабывання няма, то памятаем, што можна ўдзельнічаць у літургіі, якая транслюецца онлайн на радыё ці тэлебачанні. На беларускай мове гэта:
  • Радыё Марыя (radiomaria.by). Святая Імша па буднях у 07.15 і 18.30, у нядзелю ‒ у 11.00 і 18.30.
  • Першы нацыянальны канал Беларускага радыё (radio1.by ці 105.7 ці па так званай радыё кропцы). Святая Імша кожную нядзелю ў 08.15.
 
Ну і нарэшце: калі ні святыні, ні інтэрнэту на вашым курорце няма, то і граху няма. Але, калі вы маеце жывыя, а не фармальныя адносіны з Богам, то кожны дзень будзеце перажываць у Божай прысутнасці, што немагчыма без штодзённай асабістай малітвы. Спадзяёмся, што нашыя парады дапамогуць вам не згубіць адносіны з Богам, і жадаем усім прыемнага і плённага летняга адпачынку!
Падрыхтавала Святлана Жылевіч