У чацвер 13 чэрвеня, ва ўспамін святога Антонія Падуанскага, перад касцёлам была асвечана фігура гэтага святога. У Каталіцкім Касцёле ён лічыцца апекуном закаханых, сужэнцаў, падарожных, ахоўвае ад неўраджаю і дапамагае знаходзіць згубленыя рэчы.
Сёння адзначаецца таксама свята Езуса Хрыста, Найвышэйшага і Вечнага Святара. Падчас святой Імшы на 11 гадзін ксёндз Станіслаў Мжыглуд нагадаў пра сутнасць святарства і заклікаў вернікаў памятаць пра святароў у малітве. 
 
«Напрацягу стагоддзяў Бог кліча на сваю службу таго, каго хоча. Кліча вельмі пабожных і не зусім пабожных людзей; кліча тых, хто з дзяцінства стаіць пры алтары і тых, хто ад гэтага алтара ўцякае. Паслугоўваецца людзьмі, якія не маюць асаблівых талентаў (напрыклад Маісей ці Ян Марыя Віянэй), але гэта не было для іх перашкодай для святасці. Святы Антоній, якога сёння ўспамінаем, быў вялікім прапаведнікам, абвяшчаў Евангелле, а праз яго заступніцтва шматлікія цуды адбываліся і адбываюцца па сённяшні дзень», ‒ распавёў ксёндз Станіслаў у гаміліі.
 
«Сёння, молячыся праз заступніцтва святога Антонія, які быў вялікім прапаведнікам Евангелля, які ўсё сваё жыццё аддаў для таго, каб прыводзіць людзей да Езуса Хрыста, будзем прасіць аб святасці нашых святароў, асабліва святароў з нашай парафіі, каб яны заўсёды былі верныя Хрысту, Найвышэйшаму і Вечнаму Святару», ‒ адзначыў пробашч.
 
Пасля Імшы ксёндз пробашч асвяціў фігуру святога Антонія.
 
Даведка:
Святы Антоній нарадзіўся ў 1195 г. у Лісабоне (Партугалія) і на хросце атрымаў імя Фернандо. Ва ўзросце 15 гадоў уступіў у ордэн аўгустынцаў-эрэмітаў у Каімбры і там прыняў святарскае пасвячэнне. Моцна ўражаны мучаніцтвам пяці францішканцаў, забітых мусульманамі, вырашае сам стаць францішканцам. Уступіўшы ў закон Меншых Братоў, прыняў імя Антоній. Спачатку ён выехаў на місію ў Марока, але з-за слабога здароўя мусіў неўзабаве вярнуцца.
Па дарозе дадому ў выніку караблекрушэння застаўся ў Італіі. Там у Антонія выявіліся вялікія прамоўніцкія здольнасці, і яго накіравалі ў Паўночную Італію, дзе дзякуючы сваім казанням ён хутка стаў папулярным. Аднойчы паслухаць яго сабралася каля 30 тысяч чалавек! Пэўны час святы правёў у Францыі, а пасля вяртання ў Італію пасяліўся ў Падуі. Святы Францішак прызначыў яго першым настаўнікам тэалогіі для Меншых Братоў, настаўнікам францішканцаў.
Антоній памёр 13 чэрвеня 1231 г. і менш чым праз год быў кананізаваны. Рэліквіі святога Антонія знаходзяцца ў прысвечанай яму базыліцы ў Падуі, дзе адбываецца так шмат цудаў, што святы Бонавентура нават аднойчы сказаў: «Калі шукаеш цудаў, ідзі да Антонія». Святы быў абвешчаны доктарам Касцёла (doctor evangelicus — евангельскі доктар). 
фота: Аляксей Жылевіч
s_antoni_pasv_1.JPG
s_antoni_pasv_2.JPG
s_antoni_pasv_3.JPG
s_antoni_pasv_4.JPG
s_antoni_pasv_5.JPG
s_antoni_pasv_6.JPG
s_antoni_pasv_7.JPG
s_antoni_pasv_8.JPG
s_antoni_pasv_9.JPG
s_antoni_pasv_10.JPG
s_antoni_pasv_11.jpg

Перад касцёлам асвяцілі фігуру святога Антонія