З 18 па 21 ліпеня ў нашай парафіі праходзілі рэкалекцыі цвярозасці. Іх арганізатарам ужо некалькі гадоў з’яўляецца Душпастырства цвярозасці Гродзенскай дыяцэзіі ў супрацоўніцтве з кс. Анджэем Бочарам, пробашчам з Далёкіх.
 
Рэкалекцыі цвярозасці збіраюць усіх, хто сутыкнуўся з праблемай алкагалізму (як самі залежныя асобы, так і сузалежныя ‒ члены іх сем’яў). У гэтыя дні з удзельнікамі праводзяць сустрэчы і канферэнцыі псіхолагі, спецыялісты тэрапіі залежнасцей, а святар разам з імі моліцца і дапамагае пазнаць Бога і навучыцца давяраць Яму сваё жыццё і праблемы. Тут дапамагаюць наладзіць і аднавіць адносіны з самім сабой і сваімі роднымі. Існуе магчымасць адпачыць на прыродзе, а ёсць і час на культурную праграму: сёлета ў межах рэкалекцый прайшоў музычны сэт-імправізацыя ў выкананні Аляксандра Велікасельскага і Галляша Сялявы. 
 
У гэтым годзе ўдзел у рэкалекцыях прынялі каля 60 асоб з розных гарадоў Беларусі: Мінска, Шклова, Мёраў і іншых. Спадар Юрый Гапонік, спецыяліст тэрапіі залежнасцей у Гродзенскім клінічным цэнтры і адказны за Душпастырства цвярозасці Гродзенскай дыяцэзіі, кажа, што людзі прыехалі з розных куткоў Беларусі, але браслаўчане, на жаль, не скарысталіся з такой цудоўнай магчымасці.
 
«У вырашэнні праблемы алкагалізму перш за ўсё нельга хаваць сваю праблему. Яе варта прызнаць і тады шукаць дапамогі, каб вярнуцца да цвярозага жыцця», ‒ адзначыў спадар Юрый.
Хацелася б думаць, што ў нашым раёне няма праблем з алкагалізмам, але, як ведаем, гэта не так. Калі вы альбо вашы родныя пакутуюць ад алкагольнай залежнасці, вы можаце звярнуцца да:
 
1. Група ананімных алкаголікаў «Ісціна» ў г. Браславе (вул. Савецкая, 3). Сустрэчы праходзяць па нядзелях у 10.00.
 
Падрабязную інфармацыю можна атрымаць па тэлефоне:
+375 33 359 97 02
e-mail: Гэты адрас электроннай пошты абаронены ад спам-ботаў. У вас павінен быць уключаны JavaScript для прагляду.
 
2. Цэнтр дапамогі залежным ад алкаголю і наркотыкаў «Светач» пры каталіцкай парафіі ў Бягомлі (Бягомль, вул. Кірава, 6).
Цэнтр аказвае дапамогу людзям, залежным ад алкаголю і наркотыкаў, незалежна ад полу, узросту і веравызнання. Тут прапануюць праграмы рэабілітацыі ад месяца да трох. Магчымы і кароткатэрміновыя курсы ў 3, 7, 14 дзён.
 
+375 (33) 345 52 78
+375 (29) 532 68 66
+375 (44) 734 64 09
Сайт: svetotch.by.  
 
Падрыхтавала Святлана Жылевіч