У нашай парафіі да руху «Марыгарытка» далучыліся новыя асобы

Тры новыя колы апостальскага руху «Маргарытка» з’явіліся ў нашай парафіі. Два з іх (14 чалавек) будуць штодня на працягу свайго жыцця маліцца ў інтэнцыі ксяндза Уладзіміра Шыдлоўскага SDS і адно (сем чалавек) ‒ у інтэнцыі ксяндза Адама Квяткоўскага SDS.

5 студзеня напрыканцы святой Імшы ў 11 гадзін гэтыя вернікі прысягнулі перад алтаром ахопліваць штодзённай малітоўнай апекай святароў.

Сутнасцю апостальскага руху «Маргарытка» з’яўляецца штодзённая малітва за канкрэтнага святара альбо законную сястру. Маргарытка — белая кветка, якая сімвалізуе прастату, чысціню і прагу ахвяравання, — выбрана як сімвал духоўнай дапамогі святарам і асобам законным. Сем пялёсткаў кветкі сімвалізуюць сем дзён тыдня. Сем асобаў, злучаных у адну «Маргарытку», ахвяруюць па адным дні ў тыдзень за святара альбо законную сястру, выбіраюць форму малітвы, якая ім больш адпавядае, і моляцца ўсё жыццё. Адзін чалавек можа належаць да некалькіх «Маргарытак», напрыклад, маліцца за сем святароў кожны дзень тыдня. Аднаго святара можна адарыць некалькімі «Маргарыткамі». Пасля складання абяцання вечнай малітвы «Маргарытка» не абавязана збірацца на супольную малітву, кожны моліцца ў тым месцы, дзе знаходзіцца.

Да гэтага дня ў нашай парафіі існавалі яшчэ дзве «Маргарыткі»: вернікі моляцца за ксяндза Станіслава Мжыглуда SDS і за біскупа Алега Буткевіча.

Святлана Жылевіч

фота: Ірына Гайдамовіч