Папяльцовая серада, а значыць і пачатак посту перад Вялікаднем, прыпадае сёлета на 26 лютага. Адзначаць урачыстасць Уваскрасення Пана будзем 12 красавіка.
Папяльцовая серада атрымала сваю назву ад абраду пасыпання галоваў попелам. У літургіі гэты сімвал суправаджаюць словы святара: «Ты прах і ў прах вернешся» або «Кайцеся і верце ў Евангелле». У гэты дзень абавязковы ўдзел у святой Імшы, а таксама (як і ў Вялікую пятніцу) прадпісана не толькі ўстрыманне ад мяса, але і пост (сціслы пост), які заключаецца ў абмежаванні колькасці спажыванай ежы. Пры такім посным абмежаванні дапускаецца адзін раз паесці дасыта, не забараняецца спажыць невялікую колькасць ежы раніцай і ўвечары (пар. Paenitemini, III. — § 2). Такі пост з’яўляецца абавязковым для вернікаў з 18 да 60 гадоў. 
 
Час Вялікага посту прысвечаны разважанню мукі, смерці і ўваскрасення Езуса Хрыста. Дапамагаюць у гэтым адмысловыя набажэнствы, уласцівыя для гэтага літургічнага перыяду: Песні жальбы і Крыжовы шлях. Касцёл заахвочвае зрабіць на перыяд посту канкрэтную пастанову, каб здолець паразважаць над двума асноўнымі вымярэннямі — адносінамі з Богам і з бліжнім. Заканчваецца Вялікі пост Імшой Вячэры Пана ў Вялікі чацвер. 
 
Заахвочваем вернікаў да ўдзелу ў набажэнствах і да плённага перажывання часу Вялікага посту.
Паводле матэрыялаў Catholic.by