19 чэрвеня 2020 года Святы Айцец Францішак дазволіў абнародаваць указ аб цудзе, здзейсненым праз заступніцтва айца Францішка Марыі Ярдана, заснавальніка сальватарыянаў. Святары менавіта гэтай манаскай супольнасці апякуюцца нашай парафіяй з 1991 года.
 
Айцей Францішак Ярдан нарадзіўся 16 чэрвеня 1848 года ў мястэчку Гуртвайл у архідыяцэзіі Фрайбурга (Германія). Пасля святарскага пасвячэння  21 ліпеня 1878 г. яго накіравалі ў Рым, дзе святар правёў большую частку свайго жыцця.
 
Матываваны апостальскай стараннасцю і імкненнем, каб усе людзі пазналі і палюбілі Езуса Хрыста Збаўцу свету, у 1881 г. ён заснаваў Таварыства Боскага Збаўцы (сальватарыянаў), а ў 1888 г. Кангрэгацыю сясцёр Боскага Збаўцы (сёстры сальватарыянкі). Арганізаваў таксама групу свецкіх людзей, з мэтай іх удзелу ў евангелізацыйнай місіі Касцёла, выкарыстоўваючы для гэтага ўсе магчымыя сродкі і спосабы.
 
У 2014 годзе ў Югдыяй (Бразілія) маладая пара, якая чакала дзіця, атрымала інфармацыю, пацверджаную некалькімі ўрачамі і спецыялістамі пра тое, што іх ненароджанае дзіця мела невылечную хваробу костак (дысплазію шкілета). Будучы членамі групы свецкіх сальватарыянаў, бацькі пачалі маліцца праз заступніцтва шаноўнага Слугі Божага айца Францішка Ярдана, просячы аб малітве і іншых членаў сальватарыянскай сям'і.
8 верасня 2014 года, акурат у гадавіну смерці айца Францішка Ярдана, нарадзілася зусім здаровае дзіця.
 
Правёўшы ўсе неабходныя кананічныя працэдуры, Святы Айцец Францішак пастанавіў, што гэта цудатворнае аздараўленне адбылося дзякуючы Божаму ўмяшальніцтву праз заступніцтва айца Францішка Ярдана.
 
Пастанова Папы, апублікаваная 19 чэрвеня 2020 года, завяршае  працэс прызнання цуду і адкрывае прамы шлях да беатыфікацыі айца Францішка Ярдана. Дата і месца цырымоніі беатыфікацыі будуць вызначаны Апостальскай Сталіцай.
 
Паводле ww.sds.pl/papiez-zatwierdzil-cud