Маслякова Ангеліна з Браслава стала прызёрам ІІІ Дыяцэзіяльнага конкурсу на веданне Святога Пісання

29 мая ў Віцебскай катэдры прайшоў фінал ІІІ Дыяцэзіяльнага конкурсу на веданне Святога Пісання. Падрыхтоўка да конкурсу працягвалася на працягу навучальнага году.

Спачатку дзеці самастойна чыталі тэкст кнігі Тобія і Евангелле паводле Мацвея. Потым збіраліся разам, каб папрацаваць у групе. Конкурс складаўся з трох этапаў: парафіяльнага, дэканальнага і дыяцэзіяльнага. З нашай парафіі ўдзельнічалі: дзве дзяўчынкі з малодшай (першай катэгорыі) і 7 удзельнікаў з старэйшай(другой катэгорыі). На дэканальны этап да нас далучыліся яшчэ ўдзельнікі са Слабодскай парафіі “Божага Провіду”: тры з малодшай катэгорыі і адзін з старэйшай.

У фінал трэба было выбраць па дзве асобы з кожнай катэгорыі, нам дазволілі - па чатыры. У фінал былі дапушчаны ўдзельнікі з малодшай групы: Маслякова Ангеліна, Кароль Даніла, Кароль Яна і Кароль Марк. А са старэйшых: Шульгоўскі Міхаіл, Яблонская Ганна, Пілат Эліна і Рудзь Лізавета. Але, на жаль, не ўсе змаглі паехаць.

У Віцебск мы прыехалі першымі з удзельнікаў. Паспелі папіць гарбаты з смачнымі пірагамі, дзеці пагулялі ў настольны футбол. Пачалі паціху збірацца ўсе ўдзельнікі. А 11 гадзіне распачалася святая Імша, якую ўзначаліў біскуп Алег. Пасля святой імшы распачаўся конкурс з уступнага задання “Біблійны алфавіт”, дзе дзеці і катэхеты ў групах выконвалі заданне. А потым дзеці пачалі выконваць асноўныя заданні конкурсу, на якія было адведзена 45 хвілін.

Пасля асноўных заданняў у малодшай і старэйшай катэгорыях вылучылася па 7 чалавек з найбольшай колькасцю балаў. Сярод гэтай сямёркі аказаліся 2 удзельніцы з нашага дэканату: наша парафіянка – Маслякова Ангеліна і парафіянка са Слабодкі – Кароль Яна. Канешне, было вельмі складана чакаць вынікаў: хто ж стане пераможцамі?! Напружанне і чаканне дапамагалі рассейваць гульні і народныя танцы, якія праводзілі валанцёры.

І ў рэшце рэшт дачакаліся! Маслякова Ангеліна заняла ІІ месца!

Мне здаецца, ад самага пачатку, у Ангеліны не было сумніву, што яна апынецца сярод пераможцаў! Яна вельмі старанна і з зацікаўленасцю ўвесь гэты час чытала разам з мамай тэкст Святога Пісання. Як сказала мне с. Даша Галубкова (арганізатар) пасля конкурсу: “Ангеліна, проста цытуе Святое Пісанне”.

Кожны з удзельнікаў атрымалі падарункі і дыпломы! Пераможцы яшчэ дадаткова атрымалі настольную гульню.

Дзеці былі вельмі задаволены падарункамі, а асаблівым чынам іскрыліся радасцю вочы Ангеліны!

Думаю, гэты конкурс вельмі карысны, бо стымулюе дзяцей, бацькоў і катэхетаў пазнаваць Божае слова!

Дзякуй вялікі арганізатарам і ўдзельнікам за вялікую працу!

С. Ірына Папакуль, SJE