Парафіяльнае свята ў гонар нараджэння Маці Божай

Восьмага верасня Каталіцкі Касцёл адзначае свята нараджэння Маці Божай. Такі тытул носіць наша святыня і парафія. Таму ў гэты дзень вернікі прыйшлі ў касцёл, каб разам маліцца праз заступніцтва Дзевы Марыі і вучыцца яе пабожнасці.

Падчас вячэрняй святой Імшы разам з прысутнымі вернікамі маліўся кс. Міхал Сапель і кс. Юрый Жаўняровіч.

У гаміліі пробашч парафіі ксёндз Станіслаў Мжыглуд нагадаў, што пра нараджэнне Марыі мы не знойдзем звестак у Бібліі. Пра гэта распавядае традыцыя і апакрыфічныя кнігі.

«Наш Пан Езус Хрыстус з’яўляецца нашым Валадаром, Марыя ― Валадаркай, Каралевай Неба і Зямлі. Імя Марыя азначае «святасць». Маці Божая была асветлена больш, чым усе святыя. Традыцыя называе таксама Марыю «зоркай», бо яна павінна прывесці нас да збаўлення», ― адзначыў ксёндз Станіслаў.

«Марыя заўсёды ёсць нашай надзеяй, суцяшэннем і дапамогай. Марыя спадарожнічае нам і паказвае, што значыць верыць і як не сумнявацца ў тым, што Бог заўсёды з намі», ― дадаў святар.

Завершылася святая Імша працэсіяй вакол касцёла.

Тэкст: Святлана Жылевіч

Фота: Ірына Гайдамовіч