У нашай парафіі прайшлі «Канікулы з Богам»

Як гэта было, - з намі падзяліліся самі дзеці і падлеткі.

Эліна Пілат:

Кожная раніца пачыналася з малітвы з сястрой Ірэнай, якая вучыла дзяцей ранішняй малітве і ўдзячнасці Богу за кожны дзень жыцця. Таксама ў першы дзень сястра Ірына і сястра Наталля вывучылі з намі песню «Дзе магу знайсці я Бога?», якая на працягу тыдня была тэмай канікул.

Таксама не будзем забываць пра ранішнюю руханку, якую праводзілі валанцёры. Пасля гэтага дзеці разам беглі на смачнае сняданне. Падсілкаваўшыся, мы збіраліся ў касцёле на cвятую Імшу, якую праводзіў для нас ксёндз Станіслаў. У гаміліі ён казаў нам пра малітву. Адразу ж у панядзелак дзеці размеркаваліся па групах. Пасля ж было знаёмства груп адна з адной.

У гэты ж дзень катэхэзу праводзіла арганістка нашай парафіі Іна Эдуардаўна. Яна расказала пра тое, як можна маліцца і праслаўляць Бога сваім спевам. У аўторак мы слухалі катэхезу, якую праводзіла с. Наталля. Акрамя заняткаў, дзеці між сабой гулялі ў розныя гульні, танцавалі з валанцёрамі, а таксама прыгалі на батуце.

Вось так прайшлі нашыя першых два дні.

Яна Рышкевіч:

Трэці дзень «Канікулаў з Богам» пачаўся незвычайна. Мы сустрэліся на турбазе, дзе прайшла экспедыцыя па лесе. Дзеці даведаліся шмат новага пра розныя расліны, а потым зрабілі смачную гарбату. Калі мы вярнуліся назад, усе паабедалі і пайшлі гуляць на вуліцу. Весяліліся, танцавалі і гулялі. Потым нам давялося пабываць на катэхэзе з сястрой Кацярынай, дзе мы напісалі пісьмо Богу. У канцы дня мы атрымалі пасілак і накіраваліся дамоў. Дзень быў проста цудоўны.

Раніца чацвёртага дня пачалася са звычайнай ранішняй малітвы, на якой мы ўзносілі да Езуса свае падзякі і просьбы. Пасля снядання дзеці мелі вольны час, калі ўсе гулялі на вуліцы і пісалі свайму «патаемнаму сябру». Потым дзеці прынялі ўдзел ў святой Імшы ва ўрачыстасць Нараджэння Яна Хрысціцеля, маліліся і гучна спявалі. Пасля абеду мы накіраваліся на турбазу, каб прайсці вяровачны гарадок. Час прайшоў вельмі весела і добра.

Ганна Вязіцкая:

Апошні дзень дзіцячага летніка «Канікулы з Богам»:

«Дзе магу знайсці я Бога? Дзе яго шукаць?» - мы ўжо ведаем на памяць адказы на пытанні лагернай песні:

- У Касцёле Хрыстовым,

- У святой Эўхарыстыі,

- Між намі, братамі,

- У Божым слове,

- У малітве штодзённай,

- Ва ўсмешцы зычлівай.

Гэта не проста словы песні. Гэта наша жыццё на працягу пяці дзён.

Гэты дзень суправаджаўся ранішняй малітвай, пасля якой быў вольны час. Дзеці знову ж гулялі і пісалі лісты да таямнічага сябра.

У гэты дзень мы, прытрымліваючыся традыцыі, разам пашлі ў касцёл на Імшу, маліліся да Найсвяцейшага Сэрца Езуса, спявалі літанію.