Як вядома, 26-27 мая ў нашым горадзе праходзіла Міжнароднае свята традыцыйнай культуры «Браслаўскія зарніцы ‒ 2018». Удзел у ім прыняў і ансамбль з Польшчы, які завітаў у нашую парафію.
У нядзелю 27 мая пасля святой Імшы ў 8.30 удзельнікі ансамблю песні і танца «Tęcza» («Вясёлка») з польскага горада Радзікова зайгралі і заспявалі некалькі вядомых каталіцкіх песень. Ксёндз Адам Квяткоўскі SDS прывітаў удзельнікаў ансамблю і заахвоціў парафіянаў далучыцца да духоўных спеваў і такім чынам разам маліцца ў нашым санктуарыі.
Ансамбль «Tęcza» быў створаны ў 1982 годзе. На працягу сваёй дзейнасці выступаў на розных пляцоўках Еўропы і з’яўляецца яркім і самабытным прадстаўніком польскай народнай культуры. 
Падрыхтавала Святлана Жылевіч