З Браслава вырушыла мотапілігрымка ў Росіцу

Трэцяя пілігрымка матацыклістаў да месца спалення росіцкіх пакутнікаў і жыхароў вёскі нямецка-фашысцкімі захопнікамі вырушыла 3 жніўня. Узначаліў яе ксёндз Уладзімір Шыдлоўскі SDS.

У гэтым годзе на пілігрымку сабралася 13 чалавек, сярод іх 3святары: ініцыятар ̶ кс. Уладзімір, кс. Кшыштаф з Мёраў і а. Пётр з Нарачы. «Гэта менш, чым у папярэдія гады, ̶ прызнаецца кс. Уладзімір, ̶ на жаль не ўсе жадаючыя змаглі вырушыць у пілігрымку з-за таго, што гэта працоўны дзень» – дадаў святар.

«Мэта пілігрымкі – прыпамінанне трагедыі, што адбылася ў Росіцы, прыпамінанне аб гераічным учынку святароў, якія не пакінулі сваю паству. Я прымаў удзел у пілігрымцы ў Чэнстахову на матацыклах і гэта мяне натхніла, каб і ў нас зрабіць такую. Хочацца спалучыць захапленне (хобі) з верай, і дзяліцца гэтым з іншымі людзьмі» – сказаў кс. Уладзімір.

«Ужо трэці раз я еду на матацыкле ў Росіцу – падзяліўся адзін з удзельнікаў Віталь Рагоўскі. ̶ Еду перш за ўсё, каб памаліцца за людзей, якіх там спалілі, але таксам за людзей усяго свету, каб не было войнаў, каб людзі адмовіліся ад зброі і ад усяго таго, што парушае супакой і разбурае свет, каб у свеце была толькі любоў, каб людзі любілі адзін аднаго і каб верылі ў Бога – гэта самае галоўнае».

Пасля малітвы ў касцёле за памерлых жыхароў Росіцы і загінуўшых матацыклістаў пілігрымы вырушылі ў дарогу.

Людміла Бурлевіч